Massive Fire : राजस्थानच्या बालोत्रा ​​जिल्ह्यातून एक मोठी बातमी समोर येत आहे. आज पाचपद्रा रिफायनरीच्या सीडीयू युनिटमध्ये भीषण आग लागली. आगीची तीव्रता इतकी होती की, त्यामुळं संपूर्ण परिसरात तात्काळ घबराट पसरली. घटनास्थळी मोठ्या संख्येनं अग्निशमन दलाच्या गाड्या रवाना करण्यात आल्या. त्यानंतर अग्निशमन दलाच्या जवानांनी आग विझवण्याचे प्रयत्न सुरु केले. मिळालेल्या माहितीनुसार, आग लागल्यानंतर सुरक्षा कर्मचारी आणि इतर कर्मचाऱ्यांना तात्काळ सुरक्षित ठिकाणी हलवण्यात आलं.

हेही वाचा : “भारत शांततेच्या बाजूने…”, मध्यपूर्वेतील युद्धाच्या पार्श्वभूमीवर पंतप्रधान मोदींचं मोठं वक्तव्य

दूरवरुन दिसत होतो धुराचे लोट :

प्रत्यक्षदर्शींच्या मते, आग लागल्यानंतर रिफायनरीच्या आवारात दूरदूरपर्यंत धुराचे लोट दिसत होते. आगीचं नेमकं कारण सध्या अज्ञात आहे, परंतु प्रशासन आणि तांत्रिक पथक या घटनेचा तपास करत आहे. ही घटना अत्यंत गंभीर मानली जात आहे, कारण उद्या पंतप्रधान नरेंद्र मोदी या रिफायनरीचं उद्घाटन करणार आहेत. मुख्यमंत्रीही आज दुपारच्या सुमारास रिफायनरीला भेट देणार होते. या घटनेमुळं सुरक्षा व्यवस्था आणि तयारीवर प्रश्नचिन्ह निर्माण झालं आहे. सध्या मदत आणि बचाव कार्य सुरू असून, प्रशासन परिस्थितीवर बारकाईनं लक्ष ठेवून आहे.

मुख्यमंत्री आज संध्याकाळी देणार भेट :

अधिकाऱ्यांनी सांगितलं की, अग्निशमन दलाच्या गाड्या तात्काळ घटनास्थळी दाखल झाल्या असून आग विझवण्याचे प्रयत्न सुरु आहेत. परिस्थिती नियंत्रणात आणण्यासाठी आपत्कालीन पथकं तैनात करण्यात आली असून, कोणतीही जीवितहानी झालेली नाही. अधिकाऱ्यांच्या माहितीनुसार, मुख्यमंत्री भजनलाल शर्मा हे देखील आज संध्याकाळी रिफायनरीला भेट देणार आहेत. पंतप्रधान मोदी उद्या रिफायनरीचं उद्घाटन करणार आहेत. अधिकाऱ्यांनी सांगितलं की, पुढील माहितीची प्रतीक्षा असून नुकसानीच्या प्रमाणाचा अंदाज घेतला जात आहे. प्राथमिक अहवालानुसार, रिफायनरीच्या क्रूड डिस्टिलेशन युनिटमध्ये आग लागली.