Bandra Slum Demolition: परिसरातील गरीब नगर झोपडपट्टीवर पश्चिम रेल्वेकडून मोठ्या प्रमाणावर अतिक्रमणविरोधी कारवाई सुरू करण्यात आली आहे. सलग दुसरी दिवशीही बुलडोझरच्या सहाय्याने अनधिकृत बांधकाम हटवण्याचं काम सुरू असताना परिसरात तणावाचं वातावरण निर्माण झालं.

कारवाईदरम्यान काही स्थानिकांनी विरोध करत पोलिसांवर बाटल्या आणि इतर वस्तू फेकल्याची घटना घडली. त्यानंतर परिस्थिती नियंत्रणात आणण्यासाठी पोलिसांनी सौम्य लाठीचार्ज केला. वाढता तणाव लक्षात घेता अतिरिक्त पोलीस बंदोबस्त तसेच दंगल नियंत्रण पथक घटनास्थळ तैनात करण्यात आलं आहे.

५ हजार स्क्वेअर मीटर जागेवर अतिक्रमण

पश्चिम रेल्वेच्या माहितीनुसार, वांद्रे रेल्वे परिसरात सुमारे ५ हजार स्क्वेअर मीटर जागेवर अतिक्रमण करण्यात आलं होतं. या जागेवर भविष्यात रेल्वेचे पाच महत्वाचे प्रकल्प उभारले जाणार असल्याने अतिक्रमण हटवण्याची मोहीम राबवण्यात येत आहे. परिसरात ५०० हुन अधीक झोपड्या असल्याने ही कारवाई पुढील तीन ते चार दिवस सुरू राहण्याची शक्यता आहे.

एका परदेशी ब्लॉगर

या प्रकरणाकडे काही दिवसांपूर्वी एका परदेशी ब्लॉगरच्या व्हिडिओमुळे सोशल मीडियाचं लक्ष वेधलं गेलं होतं. रेल्वे लाईनलगतच्या झोपडपट्ट्यांमुळे सुरक्षेचे प्रश्न निर्माण होत असल्याची चर्चा त्यानंतर रंगली होती. यानंतर रेल्वे प्रशासनाने कारवाईला वेग दिला.

2017 मध्येही अतिक्रमण हटवण्याचा प्रयत्न

याआधी 2017 मध्येही अतिक्रमण हटवण्याचा प्रयत्न झाला होता. मात्र, काही रहिवाशांनी न्यायालयात धाव घेतल्याने प्रक्रिया रखडली होती. अखेर उच्च न्यायालयाच्या आदेशानंतर पात्र बांधकामांना संरक्षण देत अनधिकृत झोपड्यांवर कारवाई करण्यास परवानगी देण्यात आली. त्यानुसार पश्चिम रेल्वेकडून सध्या मोठ्या प्रमाणावर अतिक्रमण हटवण्याची मोहीम सुरू आहे.

रेल्वे प्रशासनाच्या मते, अतिक्रमण हटवल्यानंतर या परिसरात अतिरिक्त लांब पल्ल्याच्या रेल्वे सेवांसाठी आवश्यक सुविधा आणि मार्ग विकसित करण्यात येणार आहेत.